Narón, 15 de Xullo de 2014.- O Alcalde de Narón, José Manuel Blanco, e o presidente do Club Narón Radio Control (R.C.), Manuel Cendán, veñen de asinar un convenio de colaboración en materia de automodelismo, cunha vixencia anual (de xaneiro a decembro de 2014). Na firma do documento tamén estivo presente a Concelleira de Deportes, Natalia Hermida. O acordo non ven dotado de partida económica, senón que o Concello colaborará cedendo as instalacións do Circuito de Automodelismo de Río do Pozo –de propiedade municipal- para que este club poida desenvolver a súa actividade deportiva. O Club deportivo R.C. Narón leva dende o ano 2007 practicando este deporte no municipio, e organiza de xeito anual o Trofeo Cidade de Narón de Automodelismo. O Concello cédelle o Circuito de Río do Pozo os martes e venres de 10:00 a 13:30 horas e de 16:00 a 20:30 horas, os sábados de 16:00 a 20:15 horas e os domingos de 10:00 a 13:00 horas. Asimesmo, o Club abre as instalacións para uso libre daquelas persoas interesadas na práctica desta actividade os venres e sábados, en horario de mañá e tarde.