Narón, 25 de febreiro de 2016. O pavillón polideportivo da Gándara acollerá esta fin de semana, a segunda fase da “Copa de España de Ximnasia Estética de Grupo 2015-2016”, organizada polas asociacións Española e Galega de Ximnasia Estética de Grupo e polo Club Acordes de Narón e na que colabora o Padroado de Deportes do Concello de Narón, tal e como indicou o edil da área Román Romero. O concelleiro anunciou esta actividade acompañado pola adestradora do Club Acordes Narón, Izaskun Hernáez, e por Marta Derungs, presidenta da Asociación Galega de Ximnasia Estética de Grupo e unha das xuízas deste evento. En total participarán nas probas 34 equipos procedentes de diferentes localidades de España (Madrid, Aragón, Murcia e Cataluña), dos que seis son de Galicia, entre eles os Clubes Acordes de de Narón e Pontedeume, Oleiros, E.X. Abegondo e María Barbeito (A Coruña), explicou a adestradora do Club Acordes Narón. Esta competición reunirá esta fin de semana na Gándara a 290 ximnastas, unha trintena de técnicos, dez xuízas e, a maiores, todas aquelas persoas que acudan como público. As probas disputaranse nas categorías Infantil (de 8 a 10 anos; de 10 a 12 e de 12 a 14); Junior (de 14 a 16) e Sénior (a partir de 16). Entre as novidades Hernáez aludiu a “este ano na van os equipos mixtos e hai máis rivalidade; en España hai tres, un de Narón, e todos asistirán a esta proba”, apuntou Hernáez. A cerimonia de apertura terá lugar o sábado, día 27, ás 16.45 horas e as competicións preliminares nas diferentes categorías desenvolveranse a partir das 17.00. Na xornada do domingo as competicións comezarán ás 10.00 horas e a entrega de medallas e trofeos será sobre as 13.30 horas. A primeira fase da Copa de España de Ximnasia Estética de Grupo desenvolveuse en Murcia a finais do pasado ano, a segunda é a de Narón e a terceira terá lugar previsiblemente en Valencia, apuntou Hernáez. Os equipos gañadores poderán participar en torneos a nivel nacional e internacional. Os catro primeiros equipos pasarán á II Fase da Copa do Mundo que se disputará en Finlandia. As entradas para asistir a esta proba deportiva poderanse adquirir a partir do sábado no Pavillón polideportivo da Gándara -de 10.30 a 12.00 e a partir das 16.00- e o domingo –desde as 9.00- e teñen un prezo de tres euros por día ou cinco euros no caso de comprar o bono para os dous días. O edil de Deportes, Román Romero, animou á veciñanza a acudir a esta convocatoria deportiva que, recordou, se disputou tamén na localidade no ano 2007. “Trátase dunha excelente oportunidade para ver o elevado nivel que teñen as mulleres e os homes que practican ximnasia deportiva tanto no noso concello como noutros de Galicia e de España”, subliñou o edil.