Narón, 31 de marzo de 2016. O prazo de inscrición na sexta andaina do programa municipal “Ponte en ruta con nós” permanecerá aberto ata o vindeiro 20 de abril, no caso de que non se cubran antes a totalidade das prazas dispoñibles. Así o anunciou o edil de Deportes, Román Romero, que recordou que nesta ocasión os participantes percorrerán o tramo dos “Camiños milenarios do Val”, duns dezaseis quilómetros. A saída terá lugar o 24 de abril ás 9.30 horas, sendo o punto de encontro dos participantes no pavillón polideportivo da Gándara. As persoas interesadas en anotarse deben facelo no pavillón polideportivo da Gándara, de luns a xoves, en horario de 9.00 a 13.00 e de 16.30 a 18.30 e os venres de 9.00 a 13.00 horas. A ficha de inscrición pode descargarse da páxina web do Padroado de Deportes de Narón: www.padroadodeportesnaron.com. A cota a pagar é de tres euros, cantidade coa que se cubren os gastos de desprazamento en autobús ata o punto de partida do itinerario e de regreso ao polideportivo da Gándara. Os camiñantes realizarán unha parada para un avituallamento e recbirán un agasallo. O programa municipal “Ponte en ruta con nós”, organizado polo Concello de Narón e a empresa Arasti Barca, inclúe outras dúas andainas polo termo municipal, que están convocadas para os días 22 de maio e 26 de xuño.