Narón, 11 de abril de 2016. O Club de Baile Deportivo Narón acadou cinco dos dez primeiros postos do Campionato Galego de Latinos que se celebrou o 10 de abril no pavillón polideportivo da Gándara, no marco do XV Trofeo de Baile Deportivo Cidade de Narón, e no que participaron algo máis de 500 persoas. O concelleiro de Deportes, Román Romero, felicitou aos participantes en xeral e ás parellas do Club de Baile Deportivo Narón en particular polo seu excelente resultado nesta proba. O mencionado clube organizou este evento contando coa colaboración, entre outras entidades, dos Padroados de Deportes e Cultura do Concello de Narón e da Concellería de Mocidade. Parellas do Club de Baile Deportivo Narón obtiveron os primeiros postos nas categorías: Xuvenil I –na que tamén lograron o segundo premio do campionato-; Youth –campións e subcampións-; Adultos I; Adultos II –campións e subcampións- e Senior III-IV –campións e subcampións-. No resto das modalidades, parellas da citada entidade deportiva local quedaron tamén no alto da táboa clasificatoria, ao acadar o segundo e terceiro posto na modalidade Xuvenil II –o primeiro foi para o Club de Baile Deportivo BTroula, de Meis (Pontevedra); o segundo en Junior II –gañou Quero Baile, de Vigo- e o segundo e o terceiro no Senior II –a parella gañadora foi da Escola de Baile Arte y Danza, de Vigo-. En representación do Club de Baile Deportivo Narón, Sandra García, destacou os resultados acadados polo clube, subliñando que “o esforzo que realizan as parellas das diferentes categorías durante todo o ano é o que lles permite situarse nos primeiros postos neste tipo de competicións”. García destacou o elevado nivel dos participantes que acoden a estas probas, e recoñeceu sentirse “moi orgullosa” dos resultados obtidos polo clube naronés, a cuxos integrantes felicitou polo seu esforzo e a súa dedicación. Pola súa banda, o concelleiro de Deportes recalcou ademais o éxito da convocatoria, recordando que durante a xornada do campionato pasaron polas instalacións do pavillón polideportivo da Gándara unhas 1.200 persoas para presenciar esta proba deportiva.